Официальный сайт монастыря
 

Тропарь, кондак, молитва преподобному Антонию Дымскому

Тропарь, глас 4-й

Добродетелей ревнителю, / пустынный житель, / подвижник веры Христа Бога нашего, / пощением и труды умертвивый плотская вожделения, / тезоимените великому Антонию, / его же житию поревновал еси, / и во его же имя божественный храм воздвигл еси, / купно с ним преподобне Антоние моли Спасителя всех / да и нас сотворит победители плотских похотей, / и храмы Духа Святаго,/ по велицей Его милости.

Кондак, глас 6-й

Сверстник и подражатель преподобному Варлааму, / послушание к нему истинное стяжав, / достоин явился еси ему преемник, / упасши до времене стадо его, / добродетелем же его поревновав, / в туюжде меру возраста достигл еси, / безмолвие пустынное возлюбив, / и угоден Господеви показался еси, / первоначальник быв пустыни при езере Дымском: / тем ти вопием: / с преподобным Варлаамом, отче Антоние, моли о нас Бога, / да даст нам такожде угодити Ему, якоже и ты, / образе послушания и безмолвия тихий рачителю.

Молитва

О пастырю добрый, учителю и наставниче наш, и святыя обители Дымския начальниче, преподобный отче Антоние! Молим тя усердно. Ты, яко имея дерзновение ко Владыце Христу и ко Пречистей Его Матери, буди о нас недостойных, иже с верою притекающих к тебе, ходатай и молитвенник теплый, заступая нас от всяких бед и напастей, да твоими молитвами и предстательством пребудем невредими от врагов наших видимых и невидимых. Моли милосердие Его, еже спасти нас от прегрешений наших, имиже весть судьбами. Моли благость Его, еже милостив подавати нам и всему миру потребная. Молися Дающему всем мир: ниспослати мир Церквам, собирая расточенныя во едино, сохранити страну нашу в мире и тишине и всякому верному в доме и на пути и повсюду дни благи и безмятежны даровати, умирити жизнь нашу, помиловати нас, предстоящих зде и за благословною виною отшедших отец и братий наших, и весь мир, и спасти души наша, да выну славим, хвалим, поем и величаем пречестное и великолепое имя Отца и Сына и Святаго Духа, ныне и присно и во веки веков. Аминь.